Kosningar til sveitarstjórnar og heimastjórna í sameinuðu sveitarfélagi
Kosið verður til sveitarstjórnar og heimastjórna í sameinuðu sveitarfélagi Tálknafjarðarhrepps og Vesturbyggðar laugardaginn 4. maí 2024 sem hér segir:
Skrifað: 26. apríl 2024
- Patreksfjörður – Kosið í Félagsheimili Patreksfjarðar (FHP) Kjördeildin opnar kl. 10:00.
- Bíldudalur – Kosið í félagsheimilinu Baldurshaga Kjördeildin opnar kl. 12:00.
- Krossholt – Kosið í Birkimelsskóla á Barðaströnd. Kjördeildin opnar kl. 12:00.
- Tálknafjörður – Kosið í Tálknafjarðarskóla. Kjördeildin opnar kl. 10:00.
Íbúar fyrrum Rauðasandshrepps eru skráðir í kjördeildinni á Patreksfirði.
Lokun kjörstaða
Samkvæmt 91. gr. kosningarlaga nr. 112/2021 má ekki slíta kjörfundi fyrr en átta klukkustundir eru liðnar frá því að hann hófst og ekki fyrr en hálf klukkustund er liðin frá því að kjósandi gaf sig síðast fram. Kjörfundi má þó slíta er allir sem á kjörskrá standa hafa greitt atkvæði og eftir fimm klukkustundir ef öll kjörstjórnin og umboðsmenn eru sammála um það, enda sé þá hálf klukkustund liðin frá því að kjósandi gaf sig síðast fram. Kjörfundi skal þó slíta eigi síðar en kl. 22 á kjördag. Þeir kjósendur sem hafa gefið sig fram fyrir þann tíma eiga þó rétt á að greiða atkvæði.
Talning atkvæða
Talning atkvæða úr sveitarstjórnarkosningunum fer fram í Félagsheimili Patreksfjarðar laugardaginn 4. maí og opnar talningarstaður kl. 21:00. Einnig verða atkvæði í heimastjórnarkosningunum talin á sama stað á sama tíma. Hægt er að fylgjast með talningunni á staðnum og verða úrslit í öllum kosningunum kynnt að talningu lokinni. Jafnframt verða úrslit kynnt á heimasíðu sveitarfélaganna.
Vakin er athygli á að kosning til heimastjórna á öllum stöðunum er hafin og fer fram á skrifstofutíma Ráðhúss Vesturbyggðar til og með föstudags 3. maí. Kosning til heimastjórna á hverjum stað fer fram samhliða sveitarstjórnarkosningunum á kjördag 4. maí í hverri kjördeild.
Yfirkjörstjórn verður með aðstöðu í ráðhúsi Vesturbyggðar á meðan á kosningu stendur.
Yfirkjörstjórn
Finnbjörn Bjarnason
Sigurvin Hreiðarsson
Edda Eiríksdóttir