Hvað er að frétta af bókasafni Patreksfjarðar?
Á bókasafni Patreksfjarðar vinnur einn starfsmaður en safnið er opið almenningi fjórum sinnum í viku.
Skrifað: 7. maí 2024
Safnið þjónustar einnig skólann og tekur á móti öllum bekkjum Patreksskóla, auk þess sem tveir hópar frá leikskólanum Arakletti koma einu sinni í viku og leikskóladeildin Klif einu sinni í viku. Þá fer bókasafnið líka einu sinni í viku með bækur í Eyrasel þar sem félagsstarf aldraðra fer fram.
Á bókasafninu er ekki aðeins hægt að fá lánaðar bækur heldur einnig spil. Eins eru reglulega námskeið og viðburðir á bókasafninu. Frá því að skólinn hófst í haust hafa ýmsir viðburðir verið haldnir, s.s. vatnslitun, hrekkjavökuföndur, teiknimyndasögugerð, klippimyndagerð, jólaföndur, búningaskiptimarkaður fyrir öskudaginn, spilakvöld og bingó. Hægt er að fylgjast með viðburðum og dagskrá bókasafnins á facebook-síðu safnins undir heitinu Bókasafnið Patreksfirði.
Í haust blésu bókasöfn Vesturbyggðar síðan til smásagnakeppni fyrir miðstig og unglingastig grunnskólanna í Vesturbyggð en þema keppninar var galdrar. Í verðlaun var bókagjöf og 5000 kr. gjafabréf. Verðlaunahafar voru kunngjörðir á Degi íslenskrar tungu og voru það Íris Ásta Lárusdóttir í 6. bekk í Patreksskóla og Guðrún Benney Ólafsdóttir í 10. bekk í Patreksskóla sem sigruðu.
Bókaklúbburinn Patreksfirði hittist einnig á bókasafninu síðasta miðvikudagskvöld hvers mánaðar en hægt að er fylgjast með því á facebook-síðu þeirra undir heitinu Bókaklúbburinn Patreksfirði.
Hvað er að frétta? er liður á heimasíðunni þar sem birtar eru fréttir af starfsstöðvum og stofnunum sveitarfélagsins.
Forstöðumaður bókasafna Vesturbyggðar
Birta Ósmann Þórhallsdóttir bokpatro@vesturbyggd.is / 450 2374